ایم کیو ایم برطانیہ ایسٹ لندن یونٹ کے زیر اہتمام دعوت افطار

ایم کیو ایم برطانیہ ایسٹ لندن یونٹ کے زیر اہتمام دعوت افطار کا انعقاد کیا گیا ۔ دعوت افطار میں ایسٹ لندن یونٹ کے ذمہ داران ، کارکنان، خواتین ، بچوں سمیت ایسٹ لندن سے تعلق رکھنے والے پاکستانی کمیونٹی نے بڑی تعداد میں شرکت کی۔دعوت افطار سے اظہار خیال کرتے ہوئے ایم کیو ایم برطانیہ کے آرگنائزر ہاشم اعظم نے کہا ہے کہ رینجرز اور قانون نافذ کرنے والے اداروں نے کراچی میں کالعدم جہادی تنظیموں کوچندہ جمع کرنے کی کھلی چھوٹ دے رکھی ہے جبکہ گزشتہ اڑتیس سال سے دکھی انسانیت کی بے لوث خدمت کرنے والے ادارے خدمت خلق فاؤنڈیشن کی سرگرمیوں پر غیر اعلانیہ پابندی عائد کردی گئی ہے جس سے ثابت ہوتا ہے کہ رینجرز کے حکام دہشت گردی میں ملوث جہادی اور فرقہ پرست کالعدم تنظیموں کی سرپرستی کررہے ہیں۔ انہوں نے کہ دنیا جانتی ہے کہ قدرتی آفات ہوں یا حادثات خدمت خلق فاؤنڈیشن بلا تعصب رنگ، نسل اور مذہب پاکستان کے ہر علاقے میں بھر پور طریقے سے اپنی امدادی سرگرمیاں سرانجام دیتی ہے۔ انہوں نے برطانیہ میں مقیم مخیر حضرات سے اپیل کی کہ وہ اپنے عطیات خدمت خلق فاؤنڈیشن کو دیں تاکہ ادارے کے فلاحی پروجیکٹس کو جاری رکھا جاسکے۔دعوت افطار سے ایم کیو ایم برطانیہ کی آرگنائزنگ کمیٹی کے اراکین سہیل خانزادہ ، شبنم طارق اور آصف سعید نے بھی اظہار خیال کیا۔ اس موقع پر آرگنائزنگ کمیٹی کے محسن سعید اور ایس ایم تابش بھی موجود تھے۔