وفاپرست کارکنان کل اسلام آباد میں پی ٹی ایم کے احتجاجی دھرنے میں بھر پورشرکت کریں، ڈاکٹر ندیم احسان

متحدہ قومی موومنٹ کی رابطہ کمیٹی کے کنوینر ڈاکٹر ندیم احسان نے اسلام آباد اور اس کے قرب وجوار میں ایم کیوایم کے تمام وفاپرست کارکنان سے اپیل کی ہے کہ وہ کل بروز بدھ اسلام آباد میں پشتون تحفظ موومنٹ کے احتجاجی دھرنے میں بھرپورشرکت کریں۔ ایک بیان میں ڈاکٹر ندیم احسان نے پشتون تحفظ موومنٹ کے رہنماؤں کی بلاجوا زوغیرقانونی گرفتاریوں کی شدید الفاظ میں مذمت کرتے ہوئے کہاکہ پرامن احتجاجی مظاہرین کی گرفتاریاں نہ صرف غیرآئینی وغیرقانونی ہیں بلکہ انسانی حقوق کی سنگین خلاف ورزی بھی ہے ۔ انہوں نے کہاکہ پی ٹی ایم کے رہنماؤں کی گرفتاریوں کے خلاف پشتون تحفظ موومنٹ کے رہنما منظوراحمد پشتین نے اسلام آباد میں احتجاجی دھرنے کا اعلان کیا ہے جس کی ایم کیوایم بھرپورحمایت کرتی ہے ۔ ڈاکٹر ندیم احسان نے اسلام آباد اور قرب وجوار میں رہنے والے ایم کیوایم کے تمام وفاپرست کارکنان سے اپیل کی کہ وہ اسلام آبادمیں پی ٹی ایم کے احتجاجی دھرنے میں زیادہ سے زیادہ تعداد میں شریک ہوکر ظلم وجبر کے خلاف مظلوم پشتونوں کا بھرپورساتھ دیں۔